انا عارفة
ان اللي بيني و بينك احلي كتير
و مش زي اللي بين باقية الناس
و عارفة كمان اننا بنعمل ثنائي مثير
مفيش مرة نكون فيها سوي مع بعض
غير ما نخلي اللي حوالينا يبصلنا و يحسدنا
علي ضحكنا و تفاهمنا
كل الصحاب و الاحباب حوالينا بيتعجبوا
احنا ازاي كده مع بعض !
نبصلهم و نضحك موت, اصلهم اكيد مش فاهمين
احنا كده , تركيبة ماتتفهمش بسهولة
و مش ممكن يقدروا يعرفوا , احنا نكون ايه لبعضينا؟؟
احنا
احنا حاجات حلوة كتير فوق بعض و جوة بعض
تفاهم و دفء و رصة حاجات متكركبة
مابنفكرش انا و انت نِسَتِفْهُم , نرتبهم
نرتب ليه , ماهما كده حلوين و زي الفل
و لما باعوز ادور علي معني و اتعب نفسي في التفكير
الاقي انها مش فارقة , كده حلوين
بس انتبه
اوعي في يوم تفكر اننا ممكن و بعد الشر
نخسر بعض
ماهو اصل لو قربنا اكتر اكيد اكيد هنخسر بعض
و صدقني
انا عارفة باقوللك ايه
وصدقني
انا عايزاك تملي معايا في حياتي
و دي اضمن طريقة نفضل فيها زي ماكنا في كل وقت
بلاش تتهور و تعملها , و تعترف بكلام
لو تقوله , هوافقك فيه , و بعديها هنخسر بعض
و صدقي انا ادري
:) بحكم السن , انا ادري
ليست هناك تعليقات:
إرسال تعليق