مانتيش حبيبتي
صوتك مابقاش بيوحشني
عينيكي ماعدش بيشدني لونهم
و مش بيجمعنا حب زي زمان
بقيت باسرح و احنا سوا
! دانا بانسي اتصل بيكي
و بقيت باكسل ارد لما تكلميني
مش باحن لذكرياتنا
و لا كل يوم افضل اخطط لمستقبلنا
ملّيت من التزامي
انتي دلوقتي مكتفاني جدا
و انا مش مرتاح
مش حاسس حواليا بالبراح
انتي خنقاني
مش هاعرف افضل كدة
حنيّتك الزايدة ربطتني
انا مش عايز أم
...خلاص
مانتيش حبيبتي من النهاردة
! و سابني و مشي
كان اناني زي عادته
كان نفسي اقوله
طب ما انت مش حبيبي من زمان
من يوم ما فارقني معاك الأمان
من يوم ما سمعت في صوتك رنة كذب
من يوم ما كنت تكلمني, و وشك في الأرض
عينك بتتحاشي عيوني علشان ماشوفش
بس حسيت
من غير ما تاخد بالك
انا كنت سيبتك
مستغربة, انت ازاي ماحسيتش؟؟؟
ليست هناك تعليقات:
إرسال تعليق